松葉蟹腿@鴻星

消費:  $146 / 人($780 4人套餐75折印花全包價 $585)

查詢訂坐電話 : 尖沙咀 26280339 荔枝角 26280323

 

 

食店環境很好

 

燕窩冬茸燴生翅 - 湯底香濃, 燕窩就唔知有幾多, 只知蛋白好多, 魚翅唔係好多, 有啲都幾大針.

百花炸釀松葉蟹腿 - 實則係蝦膠釀蟹腿, 蝦膠好爽口彈牙, 啖啖蝦肉, 原隻蟹腿, 好味呀>>>>>>>

啲蟹肉炸過都好鮮甜嫩滑

川椒雞帶子 - 帶子得幾隻咁大把, 好彩夠一人一隻, 實在太好味大大隻, 爽口味鮮, 完全食唔出雪藏味, 雞肉一啲都唔"鞋"口, 入味呢味5個叻滿分

脆皮烤野鴨 - 第一次食咁細隻BB烤鴨, 肉質比平時食的大燒鴨天壤之別, 皮脆肉嫩, 有肉汁, 亦醃得入味, 鹹淡適中, 全檯都話第一次食咁好味的烤鴨, 但千祈唔好期望會好多肉喎.

原隻鮑魚花菇

鮑魚食得出係罐頭鮑炆得唔夠入味, 失望 反而幾棵黃芽白好鬼死好食, 吸收晒啲鮑汁又"淋"又甜 .

飄香荷葉飯 - 飯有荷香, 濕濕地, 唔錯.

麻沙慈 - 無咩特別

好鐘意佢啲水晶燈

 

餐單 :

燕窩冬茸燴生翅 (位上)

百花炸釀松葉蟹腿 (每位一隻)

脆皮烤野鴨

川椒雞帶子

原隻鮑魚花菇 (每位一隻)

飄香荷葉飯

麻沙慈

紅豆沙

-------------

HK$585

=============

食後感 :

自從食左佢個所謂得獎名菜, "雞煲翅"勁難頂之後 (湯鹹得0黎無雞味), 已經 2 年幾無去鴻星食飯,  唔知點解好多酒樓做做吓都係咁, 越食越唔得之但係咁貴, 當消費者傻似的, 精明消費者一唔對路過檔食啦, 仲會做傻仔咩! 今次再試,全因佢肯放低身段以優惠價新吸客, 食完今餐對佢地有番 d 信心, 食物有番初初幫襯時的水準, 不過除左呢個全包優惠餐外, 其他食物同套餐都係好鬼死貴, 真係大時大節先捨得食.

大埔滘郊遊.泡山泉

行程 : 約3小時 (2小時撥水大戰及泡山泉)

難度 : * (最難行五粒星)

交通 : 1. 專線小巴 28K 大埔墟－沙田(白鶴汀街)

            2. 九巴

                72A 長沙灣－太和

　   　     72A 大圍鐵路站－大埔工業邨

　　        73A 愉翠苑－彩園

　　        74A 觀塘碼頭－太和

 

坐小巴或巴士都可以在大埔道松仔園巴士站下車，朝大埔方向步行約5分鐘便到 避車處, 即大埔滘自然護理區的入口 (在巴士站車路向下望到的小涼亭)

 

簡介: 大 埔 滘 特 別 地 區 ， 在 大 埔 滘 村 附 近 。 對 大 自 然 特 別 有 興 趣 的 人 ， 包 括 自 然 學 者 和 生 物 學 家 ， 以 及 需 要 清 靜 而 未 受 破 壞 環 境 的 人 ， 該 區 早 已 成 為 他 們 常 到 的 地 方 。 該 區 本 來 稱 為 大 埔 滘 植 林 區 ， 那 是 指 停 車 場 附 近 溪 流 的 陡 斜 集 水 區 內 四 百 四 十 公 頃 樹 木 ， 樹 林 自 海 拔 五 十 米 伸 展 至 海 拔 六 百 五 十 米 的 草 山 山 頂 。

要知多 D : http://www.afcd.gov.hk/tc_chi/country/cou_vis/cou_vis_cou/cou_vis_tpk/cou_vis_cou_tpk.html

從入口處直行, 很快便會到達第一個山泉(約20分鐘)

第一站就係呢度

 

我的計劃原是不下水的, 只想放對腳落水, 等小魚幫我對腳去死皮. 唉! 點知俾呢班猩猩青蛙狂撥, 撥到連底底都濕埋, 唔落水都唔得, 人算不如天算, 好彩早有預備, 帶定衫褲更換.

 

撥水大戰開始 - 港女大戰野生動物.....即係啲青蛙同猩猩囉.

沿水源行上少少,會見到很多小溪流.

這裡除了玩水, 其實行山都會係一個唔錯選擇, 山路大部份都有樹蔭, 唔怕晒.

再行前約 20 分鐘, 便到達第二個山泉, 依個比第一個細, 但勝在有水力 massage 做, 我做左 2 分鐘, 已經頂唔順, 雖然好舒服, 但水的衝力好大兼且山水冰凍, 沖沖吓, 好凍呀.

都係讓位俾林一峰同孫燕姿談心吧.

 

玩後感 :

第一次係山度落水玩到咁癲, 山水好冰涼, 大熱天時, 一家大細行完山, 來泡個山泉, 玩玩水, 一定好溫馨, 不過我………溫馨無我份, 為左反擊 e 班野生動物, 撥到周身骨痛, 真陰功, 所以我地立志要報仇報仇報仇報仇報仇…………

大埔滘郊遊前奏 - 海鮮餐

交通:大埔墟火車站市政綜合大樓出口

地址:大埔墟市政綜合大樓大樓 2 樓熟食檔伽文小菜

消費: $85 / 人

 

首先6個女人仔負責去大樓地下街市買海鮮, 男士上熟食檔搵定加工食堂開定位, 街市好大, 最緊要有冷氣, 行得舒服, 海鮮檔選擇多的是, 我地行左一陣, 主力在這檔買, 6斤半的蟹, 比佢偷左 2 兩 , 不過就送左兩隻扇貝.

最貴 D 蟹,  6斤半的蟹用左 budget 的一半即 $350

2 樓熟食檔原來有好多野食, 有冷氣, 地方算乾淨, 去開大埔再來食點心.

白灼蝦 – 普通機圍蝦, 但肉質都幾爽甜.

醬燒茄子 – 好好食  淋香.

唔知乜雞煲 - 香辣, 雞好入味, 雞肉都幾滑.

清蒸雙斑 – 呢間食店 d 海鮮整得唔錯, 條魚蒸得滑滑的, 鼓汁都唔錯.

薑蔥炒蟹 - 蟹夠大隻, 多肉食, 蟹肉嫩滑鮮甜, 貴 d 都係值.

果皮蒸鮮鮑仔 –幾大隻o架, 好爽口, 朋友話因為無洗乾淨就拿去蒸, 所以爽口唔韌喎??? 所言什是啦, 因為用刷刷洗鮑魚面, 是會令鮑魚收縮而肉質變得韌起來, 算啦, 無幾可, 大菌食細菌, 細菌當補品

蒜溶豆鼓蒸扇貝-有少少韌, 好難脫肉, 食得有啲難度.

 

餐單 :

白灼蝦 3 斤

清蒸雙斑 2 條

薑蔥炒蟹6斤半

果皮蒸鮮鮑仔 14 隻

蒜溶豆鼓蒸扇貝 22 隻

醬燒茄子

唔知乜雞煲

3 個清炒菜

牛肉炒飯

“姑勞”肉飯

海鮮加工 $265

------------------

HK$1,150

===========

食後感 : 自己去買海鮮, 唔新鮮唔買, 當然會好食, 最緊要係加工費唔貴, 自己係屋企煮一定無咁既效果, 一來火爐唔夠食店咁猛, 二來唔識控制火喉, 都係o個句, 有 d 錢都係要俾人賺,  $85食到咁多海鮮, 超抵, 又好味, 上次去布袋澳食, 海鮮少過今次, 卻要$190.

 

小炒王@金潮小廚

交通:  葵芳港鐵站葵涌商場行天橋過去,真係要睇地

            圖先搵到.

地址:  葵芳榮芳路9號恆景花園詔商場C02 .14-15鋪

消費 :  $70 / 人 (免加一)

訂坐電話 : 26100488

營業時間 : 11.00a m -2.00a m

 

今次係第三次去食, 連同上二次食左很多不同款式, 水準都幾高, 不過來這裡食飯要有心理準備, 準備乜?? 呢間食店唔憂做, 星期一至日都大排長籠, 自然就串炳, 規矩多多, eg 要即日訂位啦, 要人齊先可以入坐, 一個都不能少, 食完便要埋單, 當然你可以拖長o黎慢慢食, 啲服務員好忙, 忙到無乜時間理你, 雖然如此, 老闆同服務員禮貌尚可.

6.30pm 去排長籠, 7.30pm 去又係咁多人, 8.30pm 都係咁多人排緊.

由於街坊生意, 店內裝修幾似茶餐廳.

胡椒大蜆湯 – 大大煲, 魚湯好鮮甜好有魚味, 蜆亦勁多, 兼無沙, 唔食得辣唔好叫, 黑胡椒落得好重手, 飲完辣得噴火, 過癮過癮, 雖然咁辣, 湯的魚味一樣咁搶咁濃, 味道好平衡.

蜜桃梅子骨 – 梅子醬的梅子勁多, 又有酸子羌, 個汁酸酸甜甜好開胃, 連排骨都好入味, 全檯都鐘意食.

南瓜斑塊盅 – 可以選擇蝦或雞代替斑塊, 味道清新, 斑塊無咩味, 啲汁都清淡, 南瓜幾香甜同粉口.

涼瓜炒肥牛 – 唔鹹, 但夠味, 好食.

招牌黃金蝦-幾乎每檯都會叫, 香口惹味, 送酒一流.

 

入口夠乾身, 唔油膩.

鲩魚皮 – 唔爽口, 有啲食丈根 feel

 

餐單 :

胡椒大蜆湯

蜜桃梅子骨

南瓜斑塊盅

涼瓜炒肥牛

招牌黃金蝦

鲩魚皮

白飯 2 碗

------------------

HK$347

===========

 

食後感 : 用料新鮮, 味道盡量忠於食物原味, 沒有"傑傑"的獻汁, 佢地既避風塘炒蟹都好正, 最緊要係收街坊的價錢, 佢地樽裝細汽水都係 $10/3支, 啲野又好食, 串就串左啲, 算啦.